ҰЛТТЫҚ БОЛМЫСЫМЫЗДЫ ЖАҢҒЫРТУҒА ЖАНТАЛАС немесе Қазақ Еліне АЛТЫН ДӘН атты ЕҢБЕК МЕРЕКЕСІ қажет! Азат өмір сүрген, рухы биік, парасатты, еңбекқор бабаларымыз қалыптастырған еңбек мерекесін заманға сай жаңғыртайық! (осы мәселелер жөнінде басқосудан бейнесюжеттер)

Арнайы www.internetTV.kz үшін Болат Нәукенұлы.
Қазақ Елі, 4 шілде 2009 жыл.

2009 жылы 1 шілде күні Алматы қаласында «Ару Ана» продюсерлік орталығының ұйымдастыруымен “Сабантой қазақтың төл мерекесі бола ала ма?” атты тақырыпта дөңгелек үстел болып өтті.

Бұл шараға этнограф-ғалым Жағда Бабалықұлы, Қазақ Елі мемлекеттік Туының авторы Шәкен Ниязбеков, атақты палуан Әбілсейіт Айханов, медицина және педагогика ғылымдарының докторы Совет-Хан Ғаббасов, тарих ғылымы докторы Мәмбет Қойгелдиев сынды елімізге танымал азаматтармен қатар “Ару Ана” продюсерлік орталығы, “Аллажар-қолдау” қоғамдық қоры, «Қазақстан тарихшылары қауымдастығы», Алматы қаласы «Жастар саясатын дамыту мемлекеттік қоры», «Алтын Арқау» әйелдердің этнографиялық қоғамдық бірлестігі және “Халық үні” қоғамдық бірлестіктер Одағының өкілдері қатысып, ұлттық болмысымызды жаңғырту мәселелерін талқылады.

Дөңгелек үстел қорытындысында, ұлттық салт-дәстүрлерімізді сақтау және оларды заманға сай жаңғырту, халқымыздың өзін-өзі сақтау тетіктері (механизмдері) болып табылатыны айтылды. Профессор Совет-Хан Ғаббасов болашақ ұлттық еңбек мерекесін «АЛТЫН ДӘН» деп атауды ортаға салды. Шараға қатысушылар, ертеде азат өмір сүрген, рухы биік, парасатты, еңбекқор бабаларымыз қалыптастырған
еңбек мерекелерін саралай келіп, бүгінгі тәуелсіз Қазақ Елінің әлемде астық экспорттаушылардың алдына шыққанын ескере отырып, жыл сайын 25 қазан күнін «АЛТЫН ДӘН» — ұлттық еңбек мерекесі» деп тойлауды ұсынды.